Waalaikumsalamm...
Et ini ade apaan rame-rame kemari? masuk kampungan gue kaga permisi. Gangguin enyak gue lagi ngemutin sendal aje....
Lah enyak lu kagak lu beliin permen bang?
bukan begitu bang, kemaren gue beliin permen kaki, malah permennye dibuang kakinye di sendalin.
ntuh sendal permen nyang kemaren...
Eh bang lu ade apaan rame-rame bawa rombongan dateng kemari?
Lah auu ini gue dateng ngintilin aje orang rame sih.... ada kecelakaan kali....
Abang orang gila kali kecelakaan malah ditonton...
Eh ngomong-ngomong orang gila, mendingan mane orang gila ama elu bang?
Mendingan gue lah....
Salah kate gue mendingan orang gila.
Lah kok?....
Lah iye mendingan orang gila, orang gila kalo minum es disedot, lah abang ditiup.
Lah ngapa emang gue tiup?
Orang berasep, abang sangke panas abang tiup...
Lahh iye gue lebih gila dari orang gila....
ahhh madirodok lu bang. Lu balik dah sono bang bikin berisik dikampung gue aje lu
kagakkk...
Lu balik ga!!!
Ogahhhh!!!
Balikkkk!!!!
Kagakkkk
Kalo lu ga mau balik biar gue yg balikk.....
Bang balik bang!!!
Iya bang.. pantang mundur... bang.. Daon kelor enak dimakan.. apa lagi dicampur ama ikan peda... Ama pelor aja dia udah kaga mempan... Kecuali di goda janda
Ilok jagoan kalahnya ama janda
(ngomong ama Jago 2).. Maju bang, lu adepin tuh Palang Pintu
(ngomong ama Besan) Iya bang.. abang diem-diem aja disini...
(ngomong ama P. Pintu) Bang.. Uler sawah uler beludak.. nyusurin jalan di tanah licin... Kalo gua udah bertindak.. Ntar nasi prasmanan bisa gua abisin
Besan kemaruk...
(ngomong ama Jago 2) Lu bikin malu ajah.. Masa lu mao abisin sendiri
Bang,., Blarak kayu jati.. Blaraknya dari Ciapus.. begerak lu mati.. kaga begerak lu mampus
Kancil berlari di pinggir Setu... Ambil gala terus tancepin... Sendiri jatoin palang pintu.. Nih orang yang belon pernah kalah bakal ngadepin
Bang... Palmereh banyak Cinenye.. Rawa Belong banyak Betawinye... Ehh baju mereh gua gak kenal namenye.. Begerak dikit bolong lu pipinye
Bang.. nih lu kenalin.. nama gua Rojali.. Orangnya item matanye jeli.. Ini ari musuh gua kaga cari.. kalo udah berantem, pantangan buat lari
Lu kaga mo lari juge ??
Pegimana mo lari.. ada rombongan bego
Bang,, Tung-tung alang-alang... alang-alang makanan sapi... Kalo emang lu kaga mao pulang.. berati lu udah siap bakalan mati
Bang,.. Roti Buaya kembang kelapa di Betawi buat arak-arakan... Eh biar kata ilmu gua belom seberapa.. kalo udah kena bekelai, ucus lu gua keja berantakan
Bang.. kalo kata orang sini ya.. Maaf-maafan bukan cuman Lebaran.. Kalo perlu tiap ari asal penuh kesadaran.. Kalah menang kaga jadi ukuran.. Nyang penting kita jalin persodaraan
Gua demen begini.. (sambil julurin tangan buat salaman)
Kaga pake bekelai kite.. (sambil nyambut salaman)... (tiba-tiba)... Ciaaattt..... (ternyata cuman boongan aja...)
Wahh... Jagoan tukang boong
Yah, ternyata ada yang tukan bohong tuh. Tapi tenang dulu, karena sebentar lagi kita simak bersama lanjutan Berbalas Pantun Betawi Palang Pintu Yang Lucu Dan Keren. Sudah gak sabar kan? Yuk mari kita simak lagi lanjutan pantun Betawi palan pintu ini.
Akhirnya P. Pintu 2 dan P. Pintu 3 dari pihak Perempuan bekelai ngeroyok Jago 2 dari pihak Lelaki. Di tengah perkelahian, mereka adu pantun kembali....
Bang... Ke Glodok beli menjangan... Jangan lupa bawain gua ikan tongkol... Dari pada itu golok bakal pajangan.. mending lu kasih si Udin buat ngupasin jengkol
(sambil ngeluarin golok)... Asal lu tau aja bang.. Ini golok gua satu-satunya dari Cibatu... Dibikinnya di bulan Maulud tanggal satu... Lu di depan gua jangan belagu.. Ntar gua tenggel pala lu buat ganjelan pintu
(Nanya ke Jago 2)... Lha, lu sendiri itu golok ngapa kaga lu keluarin bang ?
Asal lu tau aja bang... Tadi ada orang Jawa minta dianterin ke Glodok... Mao beli keran yang rada panjangan... Ehh.. kalo gua udah keluarin ini golok... Tujuh kelurahan pada kemalingan
Asal jangan abis mantun ntar lu di bawa ke Polsek
Mereka bekelai kembali dengan sengit sambil menggunakan senjata mereka yaitu GOLOK. Dan... pertandingan kali dimenangkan dengan susah payah oleh Jago 2 dari pihak lelaki
Akhirnya, sudah ada pemenangnya. Tapi apa pantun palang pintu Betawi Rawa Belong ini sudah selesai? Ternyata belum lho. Wah panjang juga ya ternyata. Yuk kita simak lagi aja lanjutannya ye...
Pegimana bang... ? Jagoan abang udah pada koit bang.. apa rombongan saye udah bole masup ??
Ntar dulu bang.... Manisan Cerme jangan diabisin... makan nasi di atas bale.. Syarat pertame udah abang penuhin... Tapi masih ada syarat nyang kedue
Masih ada lagi bang syaratnye ? Sebutin dah bang
Bang.. Tukang sekuteng dagangnya malem.. Jalannye muter ke pasar Kranji... Saye minte abang kaga cuman jago berantem.. tapi saya pengen denger abang pada ngaji
Cuman itu bang syaratnye ?
Kalo itu bisa.. silakan dah masup bang
Bang.. Tumbuk ketan jadiin uli.. Ulinye juga kudu ditapein... Betaun-taun anak Betawi belajar ngaji... Nih Sikehnye tulung dengerin
Sikeh pun dilantunkan dengan merdu dan jelas
Pegimana bang ?? Apa ada lagi syaratnya bang ?
Udah bang... Silakan dah abang ama rombongan pada masup bang
Bang... Siang ari di Gondasari.. kalu malem ada di Munjul.. Ini ari dia mukanye beseri.. Lantaran besok malem dia mao macul
Dan... Lagu Sholawat pun dinyanyikan oleh Tim Marawis/ Hadroh mengiringi masuknya penganten Lelaki ke rumah Penganten Perempuan... Dan Drama Palang Pintu pun usai
Facebook
0 komentar:
Posting Komentar